05.12.2019

Hazırda geniş miqyas almış QİÇS epidemiyası insan həyatı üçün təhlükə törədən bəlaya çevrilib. Bu xəstəliyə yoluxmuş şəxs təxminən 5-10 il ərzində sağlam görünür və bu virusun orqanizmdə kök salmasından xəbəri olmur. QİÇS immun çatışmazlığı immun sisteminin mühüm toxumalarının böyük bir hissəsinə yayılmaqla inkişaf edir. Bu zaman immun sistemi o qədər zəifləyir ki, artıq orqanizmin müxtəlif yoluxucu və şiş xəstəliklərindən müdafiə imkanı tamamilə tükənir.

QİÇS xəstəliyinə yoluxma cinsi yolla, damardaxili inyeksiyalar, içərisində virus olan qanın və ya qan preparatlarının sağlam adama köçürülməsi, virusla infeksiyalaşmış iynə ilə sağlam adama damardaxili inyeksiyalar yolu ilə, həmçinin bərbərxana və gözəllik salonlarında QİÇS-ə yoluxmuş şəxsin qanı ilə təmasda olmuş kəsici alətlərin istifadəsi yolu ilə (manikür, tatuaj, qulaq deşmə, üz qırxma və s.) baş verə bilər.
Bu xəstəlikdən qorunmağın yeganə yolu sağlam həyat tərzi keçirmək və təsadüfi insanlarla münasibətlərdə ehtiyatlı olmaqdır.